كتب القيادي في التيار الوطني الحر في جزين جاد صوايا على صفحته على فايسبوك:

طفح الكيل يا زياد اسود.. رسالة موجهة الى الرئيس عون والوزير باسيل!

رح خبرّكن اليوم هيدي الخبرية، يمكن مش كتير بوقتها، بس ضروري الكلّ يعرفها:

كنت بتمنّى بهيدا الوقت الصعب، يوقف التيار صفّ واحد خلف الوزير باسيل والرئيس عون، ولكن بوجود اشخاص متل زياد اسود، هلقد سيئين، ما عندن هدف من 7 سنين لليوم الاّ تشويه صورة باقي الاشخاص بمنطقة جزين، بزعل انّو صرنا هون، وعم نرجع الى الوراء..
اليوم بدّي خبركن القصة الكاملة تتكون واضحة امام الرأي العام..

بال 2012 اجتمعنا انا وزياد اسود وصرنا اصحاب مع بعض، ومن بعد ما ساعدتو بتنفيذ العديد من المطالب الى حدّ صارت الأمور OVER .. انقلب زياد علييّ وصار بدّو يشوهلي صورتي وسمعتي امام التيار وامام الرأي العام كمان.. انتَ عارف يا زياد انّك عم تشوّه صورة شخص عم بساعد اكثر من 2000 شخص، وعم بساعد عائلات محتاجة، بس انا بِفعَل ما بحكي بعكسك.. ما عندك غير الكلام الفاضي والتجريح!!!

بال 2012 ، العماد عون قلنا بوقتها يلّي بيحصل على العدد الأكبر من الأصوات ضمن الطائفة تبعو بيترشّح ع الانتخابات النيابية وهيك كان لازم يصير بس طلعت الأول كاثوليكياً ولكن من بعد حرتقة من زياد.. بطّلت مرشّح للانتخابات النيابية، بالرغم من هيدا كلو، سكتت كرمال العماد عون وكرمال التيار.. بس اليوم مش قادر اسكت.

القريبين من زياد اسود، اصدقاء وعائلة، تهجموا ع مرتي كيف نزلت وشاركت بمظاهرة من كم نهار، علماً انو نزلت يوم واحد وتحديداً كم ساعة ورجعت انسحبت، من بعد ما اكتشفت انو التظاهرة مسيّسة وبطّلت سلميّة وحادت كلياً عن اهدافها، وما مشيت مع توجه قناة "الجديد" يلي هيي عم تقدّم برنامج معن.. وكرمال موضوع وسائل الاعلام.. الجميع بيعرف انو داليا غادرت الـ Otv من بعد اتفاق مع رئيس مجلس الادارة، وانا 8 سنين ادفع من مصرياتي كرمال البرنامج من دون منّة من أحد.. لذلك ما حدا يربحّني جميلة بشي او يزايد عليي..

انا كنت وما زلت بنتمي للتيار الوطني الحر، بس انا تيار بالفعل وبالأخلاق مش متل غيري، بيبعت المرافقين تبعو ومنن "وائل حرفوش" يلّي بيتشغل بمركز "جرف الثلوج" وهويّ بيقبض مصاري منّك وبيتشغل معك بنفس الوقت، هيدي غير العدد الكبير من الناس يلّي فوتّن بطريقة غير شرعية ع املاك الدولة (اوجيرو مثلاً ومؤسسة مياه الجنوب -جزين..) كرمال مصلحتك الشخصية!

أنا عنجد بأسف كيف في شخص يكون نائب، علماً انّو التيار عملك نائب واكيد مش بأصواتك! بأسف كيف شخص بموقع المسؤولية عندو هلقد كره وحقد طائفي ضدّ الشيعة والسنّة والدروز، وحتّى المسيحيين يلّي ما بيمشوا معو!!

الحصانة النيابية يا زياد، ما بتقدّم ولا بتأخر، الحصانة الحقيقية هييّ الحصانة النابعة من حبّ واحترام الناس مش الحصانة يلي بتصير معك بس تفوت ع مجلس النوّاب!!

منعرف كتير منيح شو عملت مع مستشار الرئيس الحالي، امل ابو زيد، والافلام الروسية والاميركية يلي ساهمت بتركيبها ضدّو كرمال الحرتقة عليه تيخسر بالانتخابات النيابية وتبيّن انت البطل! بالاضافة للمشاكل مع خليل حرفوش والاتهامات الباطلة، لأن ما بتحب حدا يبّين بوجودك بالمنطقة.. شعارك الدائم، انا او لا أحد!!

آخر همي المناصب، لا النيابة ولا الوزارة ولا أي منصب، مش هدفي من هيدا الكلام الحصول على منصب او انّو زعلان، كون أكيد.. المناصب اذا اخدتها، لازم اكبر فيها وصير أقوى واستغلها كرمال ساعد الناس ووصّل صوتها الحقيقي والمطلوب مش كرمال منافع خاصّة.

أنا كلّ شي حكيتو وقلتو هويّ جزء من حقائق كتيرة، وموجودة مع اثباتات ضدّ زياد اسود وضدّ اقرباء واصدقاء بيشتغلوا معو، وفيي اكشف كلّ شي بأي لحظة!

وانا مسؤول عن كل كلمة قلتها، والعماد عون والوزير باسيل بيعرفوا كل هالتفاصيل كتير منيح.. والايام الجايي والحقيقة ما بتنحجب!