لا كهرباء ولا ماء ولا انترنت ... وبعدن بيقولو لبنان .... مرحبا لبنان

التصنيف: إقتصاد

2012-07-05 03:23 م 3007

المهندس خضر زهرة
لا كهرباء ولا ماء ولا انترنت وقريبا الإتصالات .. وبعدن بيقولو لبنان ... ااااه مرحبا لبنان

ادغال افريقيا فيها كهربا ومي ونحنا بعدنا عم ندور كيف بدنا نعمل واسطة مع صاحب التركتور ليجبلنا شويت مي ولك ريحتنا طلعت وبعدن بيقولو لبنان .... مرحبا لبنان

حديث الساعة آخر الشهر اديش بدو يزيد الإشتراك هالشهر ... الله يستر ... والحلو اذا بتيجي لتناقشو بعصب بسرعة وبيقلك مش عاجبك ؟؟ الغي الإشتراك ... ولك له يا عمي طول بالك وما تزعل الحق معك وانا بأمر خاطرك ... ولك الله يلعن الشيطان نسيت انو ما في كهربا من الدولة...

وبعدن بيقولو لبنان .... مرحبا لبنان

منيجي على الإنترنت الشي الوحيد يلي بخلي الواحد يضهر برات لبنان وهوي ببيتو المشكلة انو بطيء ؟؟ ماشي الحال ... بس مبارح امر صاحب الأمر بقطع الإنترنت صارت الناس تسأل شو صار ... اجا الجواب مش معروف ايد مين بإجر مين .... فهمتو شو بقصد .. بعرف انو اللبناني بيفهما على الطاير...

وبعدن بيقولو لبنان .... مرحبا لبنان

منيجي للشهر الأمني... شهر امني بإمتياز ٥٠٠ مخالفة حزام وشي ٢٠٠٠ مخالفة ميكانيك .... يلا خدو عالحجز ... روح دفاع الميكانيك ودفاع الضبط وتعا لعنا .... ولك هوي بالأساس لو معو مصاري ليدفع الضبط ما كان راح عمل ميكانيك وشو بدك تحكي لتحكي حدث ولا حرج... عم فكر جيب حمار بس المشكلة انو بدو رخصة من وزارة الزراعة يعني متل الرابيد فأفضل شي المشي على الإجرين ممتاز كرمال صحتك بترَوِح الكوليستيرول وبساعدك لتهضم الأكل ... بس لمصيبة شو بدو يعمل يلي اساسا بلا أكل

وبعدن بيقولو لبنان .... مرحبا لبنان