بقلم : خليل إبراهيم المتبولي
- شو بها سيارتك ؟ صرلي فترة شايفها واقفة ولا حركة .
• شو بدّي قلّك وخبرك ، الحق علييّ
- الحق عليك ما اخلتلفنا ، بس كيف ؟
• ضل حدا ما ركبها ، وما لعب فيها ، وما سوّا الهوايل فيها
- طيب ليه ؟ ليش سمحتلهم ؟
• أنا ما سمحتلهم ، هنّي ينتدبوا حالن على سواقتها ، ويحتلّوها
- وأنت شو تعمل ؟
• شو بدّي أعمل ؟ قاوم وأوقف بوجهم ، بس عالفاضي ، هنّي أقوى
- هنّي أقوى من ورا ضعفك ، واستهتارك كمان
• استهتاري ؟!
- إي طبعًا ، تاركها على حالها ، وتارك فسادهم يعشش فيها
• ما بصير هالحكي ؟
- مبلى ، بصير ، تاركهم يسوقوها ويخرّبوها ، وأنت تاركها لا بتعمللها صيانة ولا بتصلّح فيها يللي بيخرب .
• ما كانوا يخلّوني ولا حتى هلأ عم يخلّوني
- مين ما عم يخلّيك ؟ شو هالحكي هيدا ؟!
• متل ما عم قلّك ، بالأول كتير ناس ساعدتني ، ناس حطت إيدها ودفشت شوي ، وناس دكّرتها ، وناس دعيتلها ...
- قصدك ناس دعيت عليها حتى وصلت لهون
• آه قولك ؟!
- إي طبعًا ، شوف هالتفسّخات بدواليبها ، كيف بدها تمشي ؟
• ما رح تمشي ، وما قادر غيّرهم ، لأنّو مش مأمنين .
- طيب اطلبهم من برا .
• جرّبت ، بعتت جبلها قطع من دول أوروبية وعربية وخليجية ، ما في نوى ، ما حدا عندو
- لأ ، مش ما حدا عندو ، ما حدا بدّو يساعدك
• ليه ؟
- ليه ؟ من ورا هالهريان يللّي آكلها ، ومن ورا عنادك
• عنادي أنا ؟
- إي طبعًا ، ما بدك تتركها
• وليه بدّي أتركها ؟
- لأنّو اهترت ، وما بقا تسوا
• طيب شو الحل ؟
- اتركها
• لأ ، ما بدّي أتركها
- إي ، خلّيك مكمّش فيها ، تتروح على جهنّم إنت وياها
• ( باستغراب وتعجّب ) على جهنّم أنا وياها ؟!.
- إي ، أقلّه حبيبي
صيدا
22/4/2021